Starfsmannastefna Grunnskóla Hornafjarðar

Fjárfesting í fólki er lykillinn að velgengni hverrar stofnunar. Mikilvægt er að byggja upp fjölbreyttan hóp starfsmanna sem býr yfir ólíkri reynslu og þekkingu.


Markmiðið með starfsmannastefnu Grunnskóla Hornafjarðar er að skólinn hafi alltaf á að skipa hæfum og áhugasömum starfsmönnum sem sýna frumkvæði og veita góða þjónustu. Einnig er mikilvægt að þeir bregðist við síbreytilegum þörfum skjólstæðinga sinna.

Hver og einn starfsmaður á rétt á góðum starfsskilyrðum og möguleika á því að vaxa og dafna í starfi. Hvatt er til þess að starfsfólk skólans axli ábyrgð, læri nýja hluti, komi með nýjar hugmyndir og sýni það besta sem í því býr. Mikilvægt er að hver og einn leggi sitt af mörkum til að móta jákvæðan og góðan starfsanda og skapa sterka liðsheild þar sem hreinskiptni og hreinskilin skoðanaskipti eru viðhöfð við lausn álitamála.

Til að ná ofangreindum markmiðum er lögð áhersla á að:

  • Gagnkvæmt traust og gott samstarf ríki innan stofnunarinnar.
  • Starfið í skólanum grundvallist af gagnkvæmri virðingu, trausti, jafnrétti og

          jafnræði.

  • Hver og einn fái verkefni við hæfi og geti á þann hátt notið sín.
  • Allir starfsmenn þekki ábyrgð sína og skyldur.
  • Allir starfsmenn þekki stefnu skólans.
  • Allir starfsmenn séu hvattir til starfsþróunar og að taka ábyrgð á sinni eigin starfsþróun og starfsánægju.
  • Starfsþróunar og símenntunaráætlun sé skýr.
  • Allir starfsmenn fari í starfsmannaviðtöl einu sinni á ári.
  • Vinnutími sé öllum starfsmönnum ljós.
  • Unnið sé eftir fjarverustefnu þar sem fram kemur hvernig tekist er á við veikindi sem

          starfsmenn þurfa að glíma við, hvernig brugðist er við sé um vinnuslys að ræða og hvernig fjarverusamtölum er háttað.

  • Stefna í eineltismálum og því hvernig tekið er á einelti, áreiti eða öðru ofbeldi sé skýr

          og allir starfsmenn viti hvert skal leitað þegar alvarlega mál eins og einelti koma upp.

  • Áhættumat fari reglulega fram til að tryggja hollustu og öryggi á vinnustaðnum.
  • Öllum starfsmönnum sé ljóst hvaða trúnaði þeir eru bundnir.
  • Jafnréttis sé gætt í hvívetna.
  • Taka vel á móti nýju starfsfólki og kynna því starfið og vinnustaðinn vel.
  • Kveðja fólk þegar það lætur af störfum.
  • Allir starfsmenn þekki starfslýsingar sínar og viti til hver er ætlast af þeim.

Ábyrgð og skyldur stjórnenda og annarra starfsmanna

Stjórnendur og starfsfólk Grunnskóla Hornafjarðar bera sameiginlega ábyrgð á því að sú þjónusta sem veitt er sé sem best á hverjum tíma og tryggt sé að langtímamarkmiðum sé náð.

Stjórnendur

Stjórnendum ber að tileinka sér góða og nútímalega stjórnunarhætti. Þeir skulu hafa að leiðarljósi jákvætt viðhorf til starfsmanna sinna, virkt upplýsingastreymi og dreifingu á valdi og ábyrgð. Þeir bera ábyrgð á störfum starfsmanna sinna og eiga að vinna með þeim að þeim markmiðum sem sett hafa verið. Einnig eiga þeir að gera starfsmönnum kleift að taka framförum bæði faglega og sem einstaklingar. Stjórnendur skulu leitast við að hafa samráð við starfsmenn sína um málefni vinnustaðarins og beita sér fyrir sem víðtækastri sátt um þau. Stjórnendur eiga að vinna að þeim markmiðum sem sett eru hverju sinni.

 

Starfsmenn

Starfsmenn eiga að rækja starf sitt af alúð og samviskusemi í hvívetna og gæta kurteisi, lipurðar og réttsýni í starfi sínu. Þeir eiga að vinna með öðrum starfsmönnum af heilindum að markmiðum þeim sem starfseminni eru sett. Þeim ber að hlíta lögmætum fyrirmælum yfirmanna sinna. Þeim ber að virða trúnað um það sem þeir fá vitneskju um í starfi sínu og gæta ber trúnaðar um. Þessi þagnarskylda helst þótt látið sé af starfi. Starfsmenn eiga að gæta þess að framkoma þeirra og athafnir samrýmist því starfi sem þeir gegna og forðast að hafast nokkuð það að, sem er þeim til vanvirðu eða álitshnekkis eða varpað getur rýrð á það starf eða starfsgrein er þeir vinna við. Starfsmenn eiga að gæta þess að þiggja ekki greiðslur eða annan viðurgjörning frá viðskiptamönnum ef túlka má það sem endurgjald fyrir greiða. Þeim ber að hafa í heiðri ýtrustu kröfur um ráðvendni, heiðarleika og réttlætiskennd í störfum sínum. Æskilegt er að starfsmenn leggi rækt við eigin heilsu og ástundi heilbrigt líferni.

Starfsþróunaráætlun, símenntun

Í síbreytilegu þjóðfélagi er rík þörf á endurmenntun hvaða starfi sem við gegnum. Til endurmenntunar telst hvers konar nám sem þroskar einstaklinginn, bæði persónulega og faglega en innan grunnskólans er fyrst og fremst horft til endurmenntunar sem nýtist í starfi. Til endurmenntunar teljast m.a. nám í viðurkenndum menntastofnunum, námskeið, fræðslufundir, kynnisferðir og annað sem hjálpað getur til við umbætur og skólaþróun.

Starfsmenn skulu leitast við að laga sig að þeim kröfum sem starfið gerir til þeirra og skulu reiðubúnir að þjálfa sig til nýrra og breyttra verkefna. Starfsþróun er á ábyrgð starfsmanns og yfirmanns og skal m.a. sinnt með starfsmannasamtölum, símenntun og samvinnu. Starfsþróun og starfsöryggi tengist með beinum hætti. Stefnt skal að því að starfsmenn eigi kost á símenntun innan sem utan stofnunar til að auka þekkingu sína og faglega hæfni sem nýtist í starfi. Það er jafnt á ábyrgð starfsmanns og yfirmanns að viðhalda og bæta fagþekkingu og aðra þá sérþekkingu sem nauðsynleg er í starfi.

Á vegum grunnskólans er lögð rík áhersla á námskeið sem öllum kennurum og öðru starfsfólki er ætlað að sækja og beinast að markmiðum og þörfum skólans hverju sinni. Rannsóknir sýna að slík námskeið eru mun líklegri en önnur til að skila sér í árangursríkara skólastarfi. Einnig geta kennarar sótt námskeið í þeim greinum sem þeir ákveða sjálfir eða eftir áhugasviðum til að styrkja og efla persónulega færni þeirra.

Í Grunnskóla Hornafjarðar er lögð áhersla á að sérhver starfsmaður komi með hugmyndir um það hvernig hann hyggst standa að endurmenntun sinni en þær hugmyndir verða að falla að stefnu skólans. Þessar hugmyndir eru ræddar og útfærðar í starfsmannaviðtölum.

Jafningjastuðningur er árangursrík leið til að efla starfsfólk í starfi. Í skólanum verður því reglulega staðið fyrir jafningjastuðningi og litið á hann sem hluta af endurmenntun og starfsþróun starfsmanna. Við slíkan stuðning skal tekið mið af stefnu skólans og kjörorð skólans höfð í hávegum, virðing, jákvæðni, vinátta, frelsi og metnaður. 

Á hverju ári liggur fyrir hvaða áherslur verða í símenntun í skólanum á næsta skólaári og tengjast þær verk- og þróunaráætlun skólans auk þess sem eftirfarandi atriði eru höfð að leiðarljósi;

  • Í skólanum er lögð áhersla á að hafa reglulega námskeið fyrir allt starfsfólk skólans sem stuðla að öflugra námsumhverfi og bættum skólabrag.
  • Skólinn hvetur starfsmenn til að taka þátt í námskeiðum sem skólinn býður upp á.
  • Skólinn hvetur starfsmenn til að taka þátt í námskeiðum sem í boði eru í sveitarfélaginu og eins námskeiðum sem aðrir aðilar bjóða upp á og styrkt geta viðkomandi í starfi.
  • Skólastjórnendur getur óskað eftir því að starfsmenn sæki námskeið á starfstíma skóla. Það skal gert í samvinnu og samráði við starfsmenn.  
  • Skólinn styrkir starfsmenn til að taka þátt í námskeiðum og endurmenntun, enda sé þátttaka í slíku skipulögð í samráði við skólastjórn.
  • Styrkur skólans er háður fjárveitingum til skólans á hverjum tíma og einnig þörf skólans fyrir viðkomandi námskeið eða endurmenntun.
  • Starfsmenn eru hvattir til að nýta sér rétt sinn til námsstyrkja frá stéttarfélögum sínum.
  • Hluta viðveru er unnt að safna saman og nýta til námskeiða á skólatíma enda er það hluti af sveigjanleika skólastarfsins.
  • Æskilegt er að starfsmenn sem sækja námskeið geri stuttlega grein fyrir námskeiðinu á starfsmannafundi.
  • Áætlunin nær til allra starfsmanna skólans.

Allir starfsmenn skólans fá skjal frá skólastjórnendum þar sem þeir eru beðnir um að skrá inn starfsþróun sína og þann tímafjölda sem þeir verja til starfsþróunar. Í starfsmannasamtölum í janúar/febrúar verður skjalið rætt með tilliti áætlunar hvers og eins starfsmans og kjarasamningsbundins starfsþróunartíma (KÍ).

Hér er mynd af vinnuferli starfsþróunaráætlunarinnar.

Starfsmannaviðtöl

Yfirmaður skal hlutast til um að starfsmannaviðtöl séu tekin að minnsta kosti einu sinni á ári. Í starfsmannaviðtali skal leitast við að fá fram hugmyndir viðmælenda um það hvernig hann geti eflt starfshæfni sína og auðgað starf sitt. Tilgangur starfsmannasamtala er að tryggja að kröfur og væntingar yfirmanna og starfsmanna séu ljósar og að samráð sé haft um umbætur þar sem þeirra er þörf. Ræða skal einnig fræðsluþörf og leiðir til úrbóta. Einnig á starfsmaðurinn í starfsmannasamtali að geta rætt líðan sína á vinnustað, frammistöðu og óskir um starfsþróun. 

Upp getur komið sú staða á vinnustað að stjórnandi þurfi að ræða við starfsmenn um eitthvað sem betur má fara í starfi hans. Við slíkar aðstæður eru notuð sérstök, formleg og umbótamiðuð leiðbeiningasamtöl. Markmið slíkra samtala er alltaf að finna jákvæða leið til lausnar þeim vanda sem upp hefur komið. 

Samskipti á vinnustað

Samskipti í Grunnskóla Hornafjarðar skulu grundvallast á gagnkvæmri virðingu, umburðarlyndi og jákvæðu viðmóti. Umburðarlyndi og virðing fyrir nemendum og samstarfsfólki eru grundvallarviðmið sem framar öðru eru til þess gerð að skapa traust í öllum samskiptum. Hafa skal í heiðri allar almennar siðareglur milli einstaklinga. Ummæli, tjáning eða annað atferli starfsmanns sem ógnar, truflar eða ögrar og veldur óþægindum verður ekki liðið. Litið verður á slíka hegðun, svo og á kynferðislega áreitni og einelti, sem alvarleg brot í starfi. Slík hegðun getur leitt til áminningar og starfsmissis. Telji starfsmaður sig verða fyrir einelti eða öðru ofbeldi á vinnustað skal hann leita til yfirmanns síns sem setur málið í farveg skv. leiðbeiningum sem fram koma í sameiginlegri eineltisstefnu sveitarfélagsins sem er á slóðinnihttp://www.hornafjordur.is/stjornsysla/reglurogsamthykktir/stjornsysla/nr/10455.  Treysti starfsmaður sér ekki til að tala við yfirmann sinn t.d. vegna þess að það er hann sem er að áreita þá er starfsmaðurinn hvattur til að ræða við annan yfirmann s.s. fræðslustjóra eða öryggistrúnaðarmann vinnustaðarins svo málið komist örugglega í ferli. Sérstaklega skal minnt á eineltisteymi á vegum sveitarfélagsins sem öllum starfsmönnum er heimilt að leita til telji þeir sig verða fyrir áreitni eða einelti á vinnustaðnum. Frekari upplýsingar um það teymi er að finna á heimasíðu sveitarfélagsinshttp://www.hornafjordur.is/stjornsysla/reglurogsamthykktir/stjornsysla/nr/10455. Ábyrgð alls starfsmannahópsins er einnig mikilvæg þegar kemur að einelti eða öðru ofbeldi á vinnustað og mikilvægt að hópurinn láti slíka hegðun ekki viðgangast verði einhver var við hana.

Vellíðan á vinnustað er ekki aðeins æskileg heldur sjálfsögð réttindi hvers og eins.

Vinnuumhverfi – vinnuvernd

Stefnt skal að því að vinnuumhverfi sé eins þægilegt og aðlaðandi og aðstæður leyfa. Stjórnendum ber að stuðla að heilbrigðu vinnuumhverfi og áhættumat skal framkvæmt reglulega. Vinnuumhverfi starfsmanna skal vera laust við hættuleg efni og aðra vá eins og kostur er. Starfsmönnum ber að fylgja þeim kröfum sem gerðar eru til þeirra um öryggi og gætni í starfi. Grunnskóli Hornafjarðar er reyklaus vinnustaður og notkun vímuefna við störf er óheimil.

Siðareglur og starfsagi

Áhersla er lögð á að starfsmenn séu stundvísir og ber stjórnanda að fylgjast með mætingum, fjarveru á vinnutíma og brotthvarfi af vinnustað áður en reglulegum vinnudegi lýkur. Starfsmenn skulu hafa í heiðri virðingu og trúnað í samskiptum bæði innan skóla og utan er varða málefni þeirra er tengjast starfsemi Grunnskóla Hornafjarðar. Þá ber starfsmönnum að fara að stjórnsýslulögum, upplýsingalögum og sérstökum siðareglum sveitarfélagsins eins og þær kunna að vera hverju sinni. Starfsmönnum ber að hlíta lögmætum fyrirmælum yfirmanna sinna, sýna heiðarleika, trúmennsku og vandvirkni og gæta þagmælsku um atriði sem þeir verða áskynja í starfi. Þagnarskylda helst þó látið sé af störfum.

Fjarvera -veikindi

Minni veikindafjarvera er líkleg til að skila sér í betri árangri og meiri vellíðan starfsmanna. Þess vegna er í skólanum unnið eftir sameiginlegri fjarverustefnu sveitarfélagsins sem miðar að því að starfsmenn viti hvert þeir eiga að snúa sér í veikindum og þeir viti hvernig unnið er með fjarveru, sjá nánar á slóðinnhttp://www.hornafjordur.is/stjornsysla/reglurogsamthykktir/stjornsysla/nr/10423. Öll vinna með fjarveru starfsmanns miðar að því að styrkja starfsmanninn þannig að hann geti tekist á við starf sitt og ekki er gripið til íhlutunar fyrr en fjarvera er orðin umtalsverð og óútskýrð.

        Í veikindatilfellum skal eftirfarandi haft í huga

  • Starfsmönnum ber að tilkynna veikindi til skrifstofu skólans að morgni hvers dags sem þeir eru veikir, nema um langvarandi veikindi sé að ræða
  • Sé starfsmaður oft frá vinnu vegna veikinda, getur skólastjórn óskað eftir að viðkomandi starfsmaður skili læknisvottorði.
  • Lengri veikindi á að staðfesta með læknisvottorði.
  • Um fjarveru starfsmanna vegna veikinda barna fer eftir ákvæðum kjarasamninga.
  • Æskilegt er að forfallaður kennari reyni eftir því sem unnt er að setja skólastjóra eða forfallakennara inn í þá kennslu sem kennarinn á að inna af hendi þann dag (þá daga) sem hann er fjarverandi vegna veikinda, t.d með því að senda skólastjóra/forfallakennara tölvupóst.
  • Óskað er eftir að kennarar hafi vikuáætlanir sínar skýrar og aðgengilegar þannig að þeir sem sinna forföllum geti unnið eftir þeim. Einnig er gott að bekkjarkennarar og faggreinakennarar hafi ávallt tilbúið efni sem hægt að grípa til ef viðkomandi kennari veikist. Hér er t.d. átt við námsefni sem nýtist til þjálfunar í námsefninu og auðvelt er fyrir hvern sem er að grípa til.
  • Minnt er á að góðar námsáætlanir auðvelda alltaf forfallakennslu.

Fjarvera - leyfi

Kennarastarfið býður upp á ákveðinn sveigjanleika sem sjálfsagt er að koma til móts við svo framarlega sem það bitnar ekki á námi nemenda. Til greina kemur að kennarar geti fengið leyfi tiltekinn tíma enda undirbúi kennarinn leyfið vel þannig að það valdi sem minnstri röskun á kennslu og starfi skólans.

Í slíkum tilfellum er um þrennt að ræða:

  • Að kennari fari í launalaust leyfi
  • Að kennari vinni leyfið af sér. Hér er t.d. um að ræða að kennarinn kenni forföll, sinni félagsstörfum eða ákveðnum verkefnum og launin gangi upp í leyfið.
  • Að hann borgi sjálfur afleysingamanni laun fyrir þá kennslu sem af leyfinu leiðir, og falli þá ekki af launaskrá meðan á leyfi stendur.
  • Sama gildir um leyfi annarra starfsmann skólans.

   Lögð er áhersla á að sveigjanleikinn verði að vera gagnkvæmur.

Vinnuslys

Verði starfsmaður skólans fyrir slysi í vinnutíma í skólanum ber honum að tilkynna það eins fljótt og auðið er til öryggisvarðar sem gerir skriflega skýrslu um óhappið og lætur skólastjóra vita.

Vinnutími

Binding á vinnutíma kennara

  • Samkvæmt kjarasamningum hafa skólastjórnendur yfir 9.14 klst. að ráða af vinnutíma kennara.
  • Bundin viðvera allra starfsmanna við Grunnskóla Hornafjarðar er á mánudögum og miðvikudögum frá kl. 14:30 til 16:00.
  • Á mánudögum er miðað við að hafa alla almenna fundi s.s. deildarfundi, almenna starfsmannafundi og kennarafundi en á miðvikudögum er tími fyrir annars konar fundi s.s. teymisfundi, fagstjórnarfundi og annað sem varðar starfsfólk á ólíkum skólastigum. Miðað er við að hafa almennan starfsmannafund fyrsta mánudag í mánuði, deildarfundi annan og fjórða mánudag í mánuði og kennarafund þriðja mánudag í mánuði. Þótt ekki séu auglýstir fundir er ætlast til þess að starfsmenn séu í húsinu á þessum tíma svo hægt sé að ná í þá þurfi þess með. Gengið er frá annarri bundinni viðveru kennara við hvern og einn í byrjun skólaárs.
  • Hluta viðveru er unnt að safna saman og nýta til námskeiða á skólatíma enda er það hluti af sveigjanleika skólastarfsins.

 

Binding á vinnutíma annarra starfsmanna

  • Bundin viðvera fer eftir ákvæði um vinnutíma í starfskjörum skólaliða, ritara og stuðningsfulltrúa. Starfsmaður í fullu starfi hefur viðveru frá 8:00 -16:00.
  • Allir almennir starfsmenn hafa viðveru til 16.00 alla mánudag og miðvikudaga. Þá eru ýmist almennir starfsmannafundir, deildarfundir og ýmis konar teymisfundir.
  • Þessir aðilar skulu sitja starfsmannafundi og samráðsfundi eftir því sem við á hverju sinni.
  • Hluta viðveru er unnt að safna saman og nýta til námskeiða á skólatíma enda hafi starfsmenn samþykkt það.

Jafnrétti

Mikilvægt er að hver einstaklingur sé metinn á eigin forsendum og fyllsta jafnræðis sé gætt milli allra starfsmanna. Í Grunnskóla Hornafjarðar er einstaklingum ekki mismunað eftir aldri, kynferði, kynþætti, fötlun, þjóðerni, né vegna trúar- eða stjórnmálaskoðana. Stjórnendur skulu sjá til þess að jafnréttisáætlun skólans sé framfylgt en hana má finna á vefslóðinni http://www.hornafjordur.is/media/vor2014/Jafnrettisaaetlun%202014.pdf

Mikilvægt er að starfsmönnum séu skapaðar aðstæður til að samræma kröfur starfs- og einkalífs eins og kostur er. Nauðsynlegt er að skapa ákveðinn sveigjanleika í starfi þar sem hægt er að koma því við. Konum og körlum skal gert kleift að minnka við sig vinnu tímabundið vegna fjölskylduábyrgðar. Starfsmenn skulu því eiga kost á hlutastörfum og sveigjanlegum vinnutíma eftir því sem aðstæður leyfa. Stjórnendur skulu hvetja væntanlega feður til að nýta sér rétt sinn til fæðingarorlofs. Jafnframt skulu þeir hvetja karla til að vera heima hjá veikum börnum sínum til jafns við konur. 

Móttaka nýrra starfsmanna

Mikilvægt er að kynna nýjum starfsmönnum starfið og vinnustaðinn. Eftirfarandi atriði ber að hafa í huga   

Gera ráðningarsamning og vinnuskýrslu fyrir nýja starfsmenn og fara vel yfir starfslýsingu. Almennir starfsmenn skrifa undir starfslýsingu.

Afhenda helstu gögn s.s. handbók, skólanámskrá, bekkjarnámskrá og starfsmannalykil allt eftir því sem við á hverju sinni.

Stofna svæði fyrir starfsmanninn á server skólans og búa til netfang fyrir hann.

Kynna starfsmanninn fyrir öðru starfsfólki, nemendum og foreldrum eftir því sem við á.

Sýna starfsmanninum skólahúsnæðið.

Sýna starfsmanninum vinnuaðstöðuna sína, afhenda þau gögn sem hann þarf til að geta notað hana s.s. lykla, bækur og fleira.

Útvega nýjum starfsmanni „leiðsagnarmann” sem hann getur leitað til fyrstu vikurnar á meðan hann er að komast inn í starfið.

Fara yfir helstu þætti sem snúa að vinnuvernd og öryggi í starfi.

Fara yfir grunnþætti í símenntunarstefnu skólans.

Mikilvægt er að taka eins á móti nýjum starfsmanni þó hann byrji á öðrum tíma en að hausti.


Trúnaður starfsmanna

Samkvæmt lögum eru starfsmenn Grunnskóla Hornafjarðar bundnir trúnaði (þagnarheiti) hvað varðar persónulegar upplýsingar um nemendur, forráðamenn þeirra og samstarfsmenn sína. Þagnarheitið gildir einnig þótt starfsmaður láti af störfum við skólann.

Persónulegar upplýsingar eru t.d. einkunnir, tímasókn, athuganir sálfræðinga og annarra sérfræðinga, athuganir gerðar af starfsmönnum skólans, heilsufar og einstök mál, veikindi, mætingar o.fl. er upp kann að koma hjá nemendum, forráðamönnum og samstarfsmönnum.

Við undirritun ráðningarsamnings staðfesta starfsmenn þagnarheit sitt.

Meðferð upplýsinga

Óheimilt er að veita upplýsingar um t.d. einkunnir, tímasókn eða annað það er varðar persónulega hagi nemenda og forráðamanna þeirra til óviðkomandi. Einnig er óheimilt að veita óviðkomandi aðilum persónulegar upplýsingar um starfsfólk skólans.

Í framkvæmd er þetta þannig að kennarar og starfsfólk veita ekki upplýsingar um einstaka nemendur, forráðamenn eða starfsfólk til óviðkomandi heldur vísa öllum slíkum beiðnum til skólastjóra.

Foreldrar eiga rétt á að fá allar upplýsingar um skólagöngu barns síns hvort sem þeir eru í sambúð eða ekki sbr. 52 gr. barnalaga 27. mars 2003. „Það foreldri sem ekki hefur forsjá barns á rétt á að fá upplýsingar um barnið frá leikskólum, skólum, sjúkrahúsum, heilsugæslu- og félagsmálastofnunum, félagsmálanefndum, barnaverndarnefndum og lögreglu. Réttur samkvæmt þessari málsgrein felur ekki í sér heimild til að fá upplýsingar um hagi forsjárforeldris”.

Í 18. gr. grunnskólalaga kemur fram að foreldrum er skylt að veita grunnskólanum upplýsingar um barn sitt sem kunna að skipta máli fyrir skólastarfið og velferð þess. Um persónuupplýsingar sem þannig er aflað eða fylgt hafa barni úr leikskóla er krafist fullrar þagnarskyldu og málsmeðferðar í samræmi við gildandi lög um persónuvernd og meðferð persónuupplýsinga. Foreldrum skal gerð grein fyrir þessum upplýsingum. Meðferð upplýsinga skal vera á hendi skólastjóra og deildarstjóra í sérkennslu. Væntanleg er reglugerð um meðferð upplýsinga og um rétt foreldra til aðgangs að upplýsingum um börn sín.

Upplýsingaflæði innan skólans

Gríðarlegt magn upplýsinga fer um skólann á hverjum degi og mikilvægt er að halda utan um þær. Í kjölfar nýlegra upplýsingalaga þarf skólinn að temja sér nýtt form í skjalavörslu og verður unnið að því næstu misserin. Eins og áður hefur komið fram er mentor sá staður sem flestar upplýsingar um nemendur eru skráðar en einnig á hver og einn nemandi vasa í sérstökum skjalaskáp sem deildarstjórar halda utan um. Reynt er að fara yfir málefni flestra nemenda á haustin en síðan er það á ábyrgð kennara að afla sér frekari upplýsinga og eða skrá þær ef til þess kemur.

Flestar upplýsingar til starfsmanna eru sendar með tölvupósti. Því er mikilvægt að fólk lesi reglulega tölvupóstinn sinn og ef það þarfnast frekari upplýsinga um mál að það leiti þá að þeim. Um leið og það er á ábyrgð hvers og eins starfsmanns að láta frá sér upplýsingar í samræmi við starfsvið viðkomandi þá er það líka á ábyrgð hvers og eins að kynna sér þær upplýsingar sem fyrir liggja og spyrjast fyrir telji þeir eitthvað vanta upp á.